Якташыбыз Ижауда “Татар кызы-2019” бәйгесендә катнашачак

"Сарман: иң яңа хәбәрләр", 25 июль 2019 - 13:20

1202

Айсылу Мирхафизхан – чыгышы белән безнең район кызы.

Бабасының исемен үзенә фамилия итеп алган. Аның әнисе Фәридә Сафина Сарманда туып-үскән. Айсылу Казан хореография училищесында белем алганнан соң, Казан Федераль университетында шул юнәлештә бакалавриат баскычын тәмамлый. Бүгенге көндә ул Мәскәүдә Б.Щукин исемендәге югары театр институтында магистратурада белемен камилләштерә. Моңа кадәр дә уку йортларын кызыл дипломга тәмамлаган кыз биредә дә сынатмый, гел “5”ле билгеләренә генә укый. Балерина, педагог-хореограф булып эшли. Ул Халыкара “Татар кызы -2019” ел бәйгесенең Мәскәү шәһәре төбәк турында катнашып, җиңүче исеменә лаек булды.
“Галәмгә охшатып, үз хыялыңа юл тот” девизы белән яши ул һәм бәйгегә дә максатчан килгән. Ижау шәһәрендә узачак ярышларда якташыбыз – Мәскәү шәһәрен, ә аның бәйге дусты Рузилә Бикова Мәскәү өлкәсен тәкъдим итәчәкләр. Финал сентябрь аенда узачак.
Бу хакта тулырак газетабызның 24 июль көнне чыккан 53 санында “IT – яшьләр” сәхифәсеннән укыгыз.