ТР Диния нәзарәтендә МХО катнашучыларга ярдәм итү тәҗрибәсе белән уртаклаштылар

Бу хакта республика Иҗтимагый палатасында узган түгәрәк өстәлдә ТР мөселманнары Диния нәзарәте рәисенең махсус операция катнашучылары белән эшләү буенча урынбасары Мансур Җәләлетдинов сөйләде.

Башта эш гуманитар миссияләрдән башланган — рухи остазлар һәм волонтерлар Донецк, Луганскига барып, хәрбиләр белән турыдан-туры очрашкан. Хәзерге вакытта төп игътибар өйләренә әйләнеп кайтучыларга озатып йөрүгә, аларның якыннарына социаль-психологик ярдәм күрсәтүгә юнәлдерелгән.

Җәләлетдинов билгеләп үткәнчә, сугыш зонасында төрле милләт һәм дин вәкилләренең бер-берсенә ярдәм итүе һәм бурычларын башкаруы аеруча ачык күренә. «Егетләр: "Анда атеистлар юк", – диләр. Исламда шәфкатьлелек бик зур әһәмияткә ия», – диде ул.

Өйгә кайткач та хәрбиләрнең үзләре, ата-аналары, хатыннары, балалары рухи һәм психологик терәккә мохтаҗ. Шуның өчен республикада «Геройлар таянычы» ресурс үзәге оештырылган. Бүген анда кризис, гаилә, яшүсмер һәм балалар психологлары, социаль хезмәткәрләр консультатив ярдәм күрсәтә.