Татарстанда этләрне теркәү мәҗбүри икәнлеге турында искә төшерделәр

Хакимият органнары эт хуҗаларына теркәү сроклары һәм теркәлү булмаган очракта административ җаваплылык турында кисәтү ясады.

Бу хакта Татарстан Хөкүмәтенең MAX мессенджерындагы рәсми каналында хәбәр ителде, дип яза "Татар-информ" МА.

«Теркәү һәм чиплаштыру — ул коры формальлек кенә түгел, ә җәмгыять алдындагы җаваплылык һәм хайванның иминлеге турында кайгырту», — дип билгеләп үттеләр ведомствода.

Эт хуҗаларына нәрсә эшләргә кирәк?

 * Өлкән этләрне (3 айдан өлкәнрәк) кичекмәстән теркәү таләп ителә.

 * Яңа хайванны сатып алганнан соң 30 көн эчендә исәпкә бастырырга кирәк.

 * Көчекләрне 3 ай тулганчы теркәргә тиешләр.

Теркәлү процедурасы ике этаптан тора:

 * Ветеринарга бару.  Клиникада хайванга микрочип урнаштыралар. Бу процедура тиз һәм эт өчен куркынычсыз.

 * Мәгълүматларны системага кертү. Чип номеры белән яшәү урыны буенча дәүләт ветеринария хезмәтенә мөрәҗәгать итәргә кирәк — анда этне «Хорриот» федераль системасына кертәчәкләр.

Теркәлү булмаган өчен штрафлар:

 * Беренче тапкыр кагыйдә бозганда: кисәтү яки 2 000 сумнан 4 000 сумга кадәр штраф.

 * Ел дәвамында кабатланса: штраф 5 000 сум тәшкил итәчәк.

Белешмә: Татарстанда этләрне «ВетИС» («Хорриот») системасы аша мәҗбүри исәпкә алу 2024 ел башыннан бирле алып барыла. Бүген республикада 62 меңнән артык хайван чиплаштырылган.

Төгәлрәк мәгълүматны район дәүләт ветеринария берләшмәләрендә белергә була.