Сарман районы командасы Минзәләдә волейбол турнирында икенче урынны алды

24-25 май көннәрендә Минзәлә шәһәрендә зур шәһәр промышленность оешмалары һәм авыл районнары җыелма командалары арасында Татарстан Республикасы волейбол федерациясе Президенты Кубогына волейбол буенча зона ярышлары узды. Командалар составында бер волейболчы хатын-кыз булырга тиеш иде. Ярышларда беренче урынны Минзәлә районы командасы алды. Сарман районы командасы - икенче, Мөслим районы командасы өченче булдылар. Җиңүче һәм призлы урыннар алган командалар волейбол инвентарьләре алыр өчен сертификатлар белән бүләкләнделәр. Шулай ук иң яхшы уенчылар грамоталарга һәм медальләргә ия булдылар.