Саклаубаш укучылары сыерчыкларны каршылыйлар

"Сарман: иң яңа хәбәрләр", 14 апрель 2022 - 09:24

1335

Март ае җитүгә, без яз килүенә куанабыз. Беренче хәбәрчеләребез - кара каргаларны көтә башлыйбыз. Аннан инде, җиң сызганып, эшкә тотынабыз: сыерчыкларга оя ясыйбыз.

Кошлар сайравын кем генә яратмый икән - ул бит матур музыка кебек, сыерчыкның "фью – фью” диюе дә: "Без килдек, каршы алыгыз!" кебек ишетелә. Кошлар - безнең дусларыбыз, дияргә яратабыз.
- Безнең Саклаубаш урта мәктәбе укучылары ел саен сыерчык оялары ясыйлар, аны күзачкысыз “сыерчык” бураннары вакытында да элгән чаклар булды. Менә быел да 5 сыйныф укучылары белән берлектә канатлы дусларыбызга берсеннән-берсе матур оялар әзерләдек. Әле соңармаганбыздыр: әткә сыерчык белән әнкә сыерчык оя сайлыйлардыр. Безнең ояларны да якын итәрләр, балалар чыгарып, рәхәтләнеп яшәрләр, безне аһәңле матур тавышлары белән сөендерерләр, күңелләребезне күтәрерләр, дип ышанабыз, - дип хәбәр итте укытучылары Альфира Габдуллина.