Матбугат үзәгеннән көн рецепты – креветкалар белән сырлы аш

Сезгә креветкалар белән сырлы аш рецептын тәкъдим итәбез.

Кирәк булалар:

• креветка - 400 грамм;
• дөге - ½ стакан;
• йомшак сыр - 200 грамм;
• кишер - 1 данә;
• башлы суган - 1 баш;
• көнбагыш мае - 2 аш калагы;
• петрушка - 1 бәйләм;
• зәйтүн мае, тәмләткечләр - тәм буенча.

Дөгене ярымәзер булганчы пешерәбез, суын агызабыз.

Туралган кишер белән суганны майда бераз кыздырабыз.

Кайнап торган суга кыздырылган яшелчәләрне салабыз.

Сыр салып эретәбез.

Дөге һәм чистартылган креветкалар салабыз, 10 минут пешерәбез.

Петрушка белән бизәп бирәбез.

Барлыгы 15 минут вакыт кирәк.