Түбән Камада гауга: ветеринар караудан баш тарткан эт клиника бусагасында үлгән

Эт клиника бусагасында үлгән, дип хәбәр итә Эльвира Дәүлекаева исемле интернетчы. Аның сүзләренә караганда, «Кама» кунакханәсе янында таксист өлкән яшьтәге ир-атның этен бәрдергән. Якшәмбе көн булганлыктан бер генә клиника эшләве ачыкланган.  

«Без анда 8:35тә килдек. Якынча 8:45тә табиб килде (клиника 9:00дан эшли). Аннан безне иртәрәк кабул итүен үтендек, эт инде тормыш билгеләре бирми башлаган иде. Табиб баш тартты», - дип хәбәр ителә социаль челтәрләрдә. Язма авторы сүзләренчә, табиб алардан ветеринария паспорты таләп иткән.  

«Күз алдыгызга китерегез әле: өлкән яшьтәге бабай, күз яшенә буылып, клиника бусагасында үлеп баручы этен түләүле кабул итәргә өнди, ә табиб котыру авыруыннан прививка кайчан ясалган, конкрет нинди вакцина, нинди клиникада дигән сорауларга җавап бирүне таләп итә. Чиратта торган кешеләр дә түзмәде хәтта, конфликт башланды. Нәтиҗәдә, табиб кабул итүдән баш тартты, эт клиника бусагасында җан бирде», — дип сөйли Дәүлекаева.  

Бер тәүлек эчендә бу тетрәндергеч вакыйга киң колач алды, ветеринар белән конфликт видеосы вируслы булып интернетта таралды, дип яза БИЗНЕС Online.

Фото: видеодан скриншот

https://matbugat.ru