Иске Кәшердә әдәби сәгать оештырылды

"Сарман: иң яңа хәбәрләр", 9 февраль 2023 - 08:53

720

Күренекле татар шагыйре, прозаик, драматург, балалар язучысы Фәнис Яруллинның тууына 85 ел тулу уңаеннан, Иске Кәшер авыл китапханәсендә «Җилкәннәр җилләр сынала»исемле әдәби сәгать үтте.

Китапханәче аның тормыш юлы, иҗаты белән таныштырды, шагыйрьнең тормышка, яшәүгә мәхәббәт белән сугарылган, тирән эчтәлекле шигырьләре укылды. Укучылар игътибарына китап күргәзмәсе тәкъдим ителде.
Язмыш сынавына сынмыйча, үзендә алга таба яшәргә генә түгел, җамгыятькә файдалы булу өчен дә көч тапкан бу көчле рухлы кешегә сокланмыйча мөмкин түгел. Аның иҗаты төрле җанр белән бәйле. Ул балалар өчен дә поэмалар, әкиятләр, шигырьләр иҗат итә. Композиторлар тарафыннан аның шигырьләренә язылган җырлар популярлык казана. Сезоннар буе сәхнәдән төшми торган драма әсәрләре дә яза. Проза өлкәсендә дә зур уңышларга ирешә.
Фәнис Яруллин 1978 елда — Татарстанның М.Җәлил исемендәге Республика бүләгенә, 1995 елда Г.Тукай исемендәге Дәүләт бүләгенә лаек була, Халыклар дуслыгы, «Татарстан Республикасы алдындагы казанышлары өчен» орденнары белән бүләкләнә. Аңа «Татарстанның атказанган мәдәният хезмәткәре», «Татарстанның халык шагыйре», «Баулы районының Мактаулы гражданы» исемнәре бирелә.