Районның алдынгы механизаторларына бәйрәм көнендә премияләр тапшырылды

Язгы кыр эшләре барышында алар арасында игълан ителгән ярышның чираттагы өчкөнлеге алдынгылары бүләкләнделәр дә. Муниципаль район башлыгы Фәрит Хөснуллин, район авыл хуҗалыгы һәм азык-төлек идарәсе начальнигы Альберт Шәрипов, идарәнең җитештерү-маркетинг бүлеге начальнигы Илнур Салихов бүген алар янында басуларда булдылар һәм премияләр тапшырдылар.

Бүләкләү “Сарман” агрофирмасы басуларыннан башланды. Премия алучыларның күпчелеге  бу юлы да шушы агрофирмадан иде: премиягә җиде механизатор лаек булды. Шикәр чөгендере чәчүдә эшләүчеләр арасында өч урынны да сарманлылар – Айдар Рәхимов, Ринат Сәгъдәтов, Рәмдүс Фәретдинов алдылар. “Үзебезнең илдә чыгарылган трактоларда эшләүче иң яхшы механизатор” номинациясендә беренчелек – шулай ук “Сарман” агрофирмасыннан Нияз Тимерҗановта. Узган елгы кыр батыры булып танылган механизаторның быел да сынатмаска исәбе. Аның хезмәттәше Мәҗит Мәрданшин бу номинациядә өченче урын өчен бүләкләнде, ә икенче урын өчен премия “Нөркәй” агрофирмасы механизаторы Фәрит Гариповка тапшырылды. Чит ил торакторларында эшләүчеләр арасында беренче урынны “Сарман” агрофирмасының алдынгы механизаторы Дамир Гайнуллин алды. Икенче-өченче урыннарда – нөркәйлеләр  Сәлмән Шакиров белән Фәнзил Гайнетдинов. Бөртекле культуралар чәчүдә эшләүче механизаторлардан беренчелек өчен премиягә “Нөркәй” агрофирмасыннан Назыйф Галиуллин лаек булды. Икенче урында – “Сарман”нан Илшат Галиев, өченчедә  –“Нөркәй”дән Валентин Бормотин.

Энҗимә Габдрәхимова язмасы һәм фотолары.