Яңача тәмле кайнатмалар

Әфлисунлы кызыл карлыган желесы

2 литр чамасы чыга.

5 кг кызыл карлыган;

1 кг әфлисун (апельсин);

4 кг шикәр комы.

Карлыганны юып (тармакларыннан араламасагыз да була), берәр савытка салыгыз да, тукмак белән яхшылап төегез. Төелгән массаны ике катлы марляга салып, согын сыгыгыз. Кечкенә-кечкенә порцияләр белән эшләсәң, уңайлырак.

Әфлисуннарның да согын сыгарга кирәк.

Әфлисун белән карлыган согын бергә кушып, шикәр комы салабыз да, эмаль савытта кайнатырга куябыз. Гел болгаткалап торабыз. Кайнатып ук чыгармыйбыз, витаминнары таркалмасын.

Кайнау хәленә җитә дигәндә, парланган банкаларга кайнар килеш тутырып, калай капкач белән томалыйбыз.

Кара карлыганнан крем

700 мл чыга.

500 г кара карлыган;

7-8 аш кашыгы көрән шикәр;

3 чи йомырка;

40 г атланмай;

бер чеметем ванилин;

бер чеметем дарчын (корица);

1 данә бадьян.

Кара карлыганны юып, киптерәбез. Аннары иләк аша үткәрәбез, калган кабыкларын марля аша яхшылап сыгабыз.

Карлыган согына шикәр һәм йомырканы кушып, яхшылап туглыйбыз да «су мунчасы»на утыртып, утка куябыз. Майны кушабыз.

Ванилинны, дарчынны, бадьянны өстәп, бераз кайнатабыз да, бадьянны алып ташлыйбыз. Крем куерырга тиеш.

Май салган крем озак сакланмый. Озак саклансын өчен, май кушмыйлар, бераз желатин өстиләр. Куергач, яхшылап туглыйлар да, кайнар килеш парланган банкаларга тутыралар. Иң яхшысы, кечкенә банкаларга тутыру, чөнки ачкач, тиз бозыла.

Чикләвекле чия кайнатмасы

2 литр чамасы чыга.

1 кг чия;

800 г шикәр комы;

300 г кабыксыз әстерхан чикләвеге;

1 аш кашыгы желфикс 1:1 (мәҗбүри түгел);

бер чеметем ванилин.

Чияне юып, төшен алабыз да, кәстрүлгә салып, 10 минут кайнатабыз.

Желфиксны 3 аш кашыгы шикәр комы белән кушып, чиягә салабыз, 5 минут кайнатабыз.

Чикләвекне җиңелчә генә ваклап, чия янына кушабыз да, 2-3 минут кайнатабыз. Шунда ук ванилинны да өстибез.

Әгәр дә желфикс салмасагыз, кайнатманы 4 тапкыр 5 әр минут кайнатабыз. Бер кайнату белән икенчесенең арасы 5-6 сәгать. Чикләвекне исә өченче кат кайнатканда кушабыз.

Кайнатманы кайнар килеш парланган банкаларга тутырып, калай капкач белән томалыйбыз, астын-өскә әйләндереп суытабыз.

Кура җиләге белән крыжовник кайнатмасы

1 литрга

500 г крыжовник;

500 г кура җиләге;

600 г шикәр комы.

Крыжовникны юып, «койрыкларын» кисәбез дә, капкачлы эмаль кәстрүлгә салып, сүрән генә утта җимешләр йомшарганчы, суы чыкканчы пешерәбез.

Аннары капкачын алып, азрак куерганчы пешерәбез.

Кайнатма куера башлагач, чүпләреннән арындырылган җиләкне, шикәр комын салып, кайнатып чыгарабыз да, утны кысып, 5 минут пешерәбез.

Джемны кайнар килеш парланган банкаларга тутырып, калай капкач белән томалыйбыз.

Әгәр дә пюре кебек булуын телисез икән, блендер белән ваклый аласыз. Аннары тагын 3 минут кайнатырга кирәк булыр.

Мәкле груша кайнатмасы

1,5 литр чыга.

1,5 кг груша (катысы яхшы);

500 г шикәр комы;

1,5 лимон;

3 аш кашыгы мәк орлыгы.

Лимонның кабыгын вак кыргычтан кырып, суын аерым савытка сыгабыз. 

Грушаның кабыгын әрчеп, телемләп турыйбыз. 

Груша телемнәрен кәстрүлгә салып, шикәр комы һәм кырылган лимон кабыгы өстәп, яхшылап болгатабыз. Груша өстенә лимон суы сибеп, 3 сәгатькә калдырабыз. 

Аннары савытны утка утыртып, 20 минут пешерәбез. Уттан алып, суытабыз. 

Кайнатманың яртысын башка савытка күчереп, тукмак белән төябез яки блендер белән изәбез дә, калган яртысына өстибез. 

Мәк орлыгын коры табада киптереп алып, кайнатмага кушабыз. 

Тагын 10 минут пешереп, кайнар килеш банкаларга тутырып, калай капкач белән ябабыз. 

Чыганак: http://syuyumbike.ru/

Фото: http://syuyumbike.ru/