Гөлшат Салихова бишекләргә йөрәк җылысын да куша
Сарман авылында яшәүче Гөлшат Салихова белән очрашырга җыенуымны белгәч, танышларым: «Нәрсәләр ясый беләсең?» – дип сорама, «Әле нәрсәне ясап карамадың?» – дип сора», – дигән киңәш бирделәр. Сөйләшә торгач, беренче карашка басынкы һәм ир канаты астында артык хафаланмыйча гына яшәүче булып тоелган ханым «эченнән» тормышка теше-тырнагы белән ябышкан, бик тә тәвәккәл, алтын куллы көчле хатын-кыз килеп чыкты. Өстәвенә үзе һәр компаниянең йөрәге булырлык җор телле дә икән әле. Ә менә туачак оныгына үз куллары белән, яратып, матур теләкләр теләп, бишек үрүе аның нечкә күңелле әби икәнлеген дә күрсәтә. Әмма тышкы кыяфәте, күңеле белән һич кенә дә әби сыйфатында түгел әле ул. Шулай итеп, безнең «Милли бизәкләр”ебез проектында яктыртылырга чын-чынлап лаек кеше ул. Ә безнең сөйләшү гомернең иң матур чорыннан – балачак иленнән башланды.
