Гыйниятуллиннарның өчесенә 99 ел нефтьче стажы бар
Без аның белән бер үк басуларда йөрдек, бер мастер кул астында эшләдек. Иксез-чиксез кырларны 31 ел буена иңләгән-буйлаган, елның һәр фасылының матурлыгын үзенчә күрә алган ханым ул Гөлзифа Гыйниятуллина. Тик шулай да эшеннән бизмәгән, киресенчә, аннан тәм табып яшәгән. Шулай булмаса, улы Флерның да оператор булып эшкә урнашуына сөенеп торыр иде микән? Җитмәсә егетнең эшли башлавының өченче көнендә үк коточкыч буран кузгала. «Гайрәте чигеп кайтыр инде бу баланың», – диеп, дүрт күз белән көтеп ала ана ул көнне улын, елмаеп кайтып керүенә шулкадәр сөенә.
