Татарстанда электр энергиясен куллану соңгы биш елда 16% арткан

Бу хакта ТР сәнәгать һәм сәүдә министры урынбасары Марат Миңбаевка сылтама биреп, «Татар-информ» мәгълүмат агентлыгы хәбәр итә. Аның сүзләренчә, агымдагы елның сигез аенда төбәктә электр энергиясен җитештерү узган елның шул ук чоры белән чагыштырганда 10%-ка арткан, ә гыйнвар аенда электр куәтен куллануның тарихи максимумы — гомуми билгеләнгән энергия системасы куәте якынча 9 ГВт булганда, 5616 МВт дәрәҗәсендә теркәлгән. Шул ук вакытта узган елгы нәтиҗәләр буенча җитештерү 31 млрд кВт·с тәшкил иткән, ә куллану 37 млрд кВт·с җиткән, Россия буенча күрсәткечләр 5,5% үсеш күрсәткән.
Республикада ягулык-энергетика ресурсларының гомуми күләменең 90%-ыннан артыгы сәнәгать һәм энергетика өләшенә туры килә. Аерым алганда, 46,2%-ын электр энергиясе, газ һәм пар җитештерү һәм тарату, 43,5%-ын — эшкәртү сәнәгате һәм файдалы казылмаларны чыгару куллана, ә калган өлеше транспорт, авыл хуҗалыгы, төзелеш һәм торак-коммуналь хуҗалык арасында бүленгән. Төбәктә шулай ук энергияне саклау буенча системлы эш дәвам итә: хәзер 2024–2029 елларга исәпләнгән дүртенче максатчан программа гамәлгә ашырыла, ә мондый чаралар гамәлдә булган чорда төбәкнең тулаем төбәк продуктының энергосыешлыгы 2007 елгы база күрсәткече белән чагыштырганда 27%-ка кимегән.