Сарман "Старт" базасында яшүсмер балалар өчен лагерь оештырылды

"Старт" спорт мәктәбенең Сарман чаңгы базасында 1-7 ноябрь көннәрендә яшүсмер балаларны сәламәтләндерү лагеры уздырылды. Бирегә 40 бала ял итәргә килде. Алар өчен төрле спорт һәм күңел ачу чаралары алып барылды. База территориясе буенча экскурсиядә, төзелеп килүче бассейнда танышу экскурсияләрендә булдылар, кинотеатрга сәяхәт кылдылар, "Хэллоуин" кичәсе уздырдылар. Шулай ук балалар Бөтенхалык экологик хәрәкәт "Җиргә бакча бүләк ит" программасы нигезендә агач утыртуда катнаштылар. Көн саен төрле физик күнегүләр ясап, сәламәтлекләрен ныгытырга да онытмадылар.