Алманы кышка ничек дөрес итеп киптерергә?

Август — алмалар тулышып өлгергән чор. Алма файдалы сыйфатларын саклап калсын өчен, аны кышка киптереп куярга була. Бу ысул хуҗабикәләрдән артык зур осталык та таләп итми.  

Киптерү өчен алманың эре, үзәге зур булмаган, юка кабыклы сортлары яхшы. Артык әче дә, артык баллы да булмасын. Шулай ук артык сусыл булмаган, көзге сортларын сайлау кулай. Бу хакта Яндекс.Дзен яза. 

Җимешләрне мондый катгый контроль белән сайлаганда, әзер продукт сыйфаты белән сөендерер, калдыклары да аз булыр.

Киптерергә әзерләү.

Киптерер алдыннан алмаларны яхшылап юып, орлыклы үзәген кисеп алыгыз. Әгәр компот кайнату өчен әзерләнә икән, үзәген калдырсагыз да була. Ярымтүгәрәк, түгәрәк яки телемләп турагыз. Һәр кисәкнең калынлыгы 5 мм дан артмасын. 

Киселгән алма телемнәре каралмасын өчен, аларны тозлы суга салып алырга кирәк. 1 литр суга 1 чәй калагы тоз салып болгатыгыз. 

Кояшта киптерү тәртибе. 

Бу борыгы ысул хуҗабикәләр тарафыннан бик еш кулланыла. Чөнки болай киптергәндә җимешләрнең бөтен файдалы микроэлементлары үзләрендә сакланып кала. 

Алмаларны киң савытларга таратып салып яки җепкә тезеп киптерергә була. 

Беренче вариантта бер рәт итеп яссы савытка тезәргә һәм дүрт көнгә кояш астында калдырырга кирәк. Тигез кипсеннәр өчен, аларны көн саен әйләндергәләп торыгыз.

Икенче ысул — туралган алма телемнәрен җепкә кидертеп, бөҗәкләр тимәслек урынга элеп киптерү. 

ЧЫГАНАК