“Сарман” газетасының “кулы” җылы

"Сарман: иң яңа хәбәрләр", 30 сентябрь 2019 - 16:30

1446

Бүген – 30 сентябрь көнне Халыкара өлкәннәр көне, өлкәннәр декадасы уңаеннан һәм Сарман мәгълүмат-мөхәррият үзәге тарафыннан инде берничә ел дәвамында уздырылып килә торган “Кайсыгызның кулы җылы, бәйлисе бар йөрәкне” хәйрия акциясе кысаларында үзәк җитәкчесе Альбина Сабирова һәм үзәк хезмәткәрләре Җәлил картлар һәм инвалидлар интернат-йортында булдылар, анда яшәүче өлкәннәр белән аралаштылар, аларга сарманлылар бәйләгән җылы оекбашларны тапшырдылар.

Интернат-йортта яшәүчеләр аларны бик теләп, рәхмәт сүзләре белән кабул иттеләр. Без исә үзебез һәм алар исеменнән әлеге игелекле эштә катнашкан – матур һәм җылы оекбашлар бәйләгән сарманлыларга чиксез рәхмәтебезне белдерәбез, ә өлкәннәргә исәнлек-саулык, иминлек һәм тыныч картлык телибез.
Зөлфия Шәрипова язмасы һәм фотолары