Сарманнан Шәймөхәммәтовлар, унбиш көн генә очрашып, өйләнешкәннәр
Сарайлы авылы кешеләренә үзләренә генә хас сөйкемлелек, шул ук вакытта тәвәккәллек, усаллык, чаялык та хас. Эшләсәләр, җир җимертеп эшлиләр, әйтсәләр – турыдан яралар, тормышның якасына ябышып яшиләр. Ә үзләренең, гадәттә, нечкә күңелле кешеләргә хас булганча, күңелләре тулы – җыр-моң. Сарман авылында яшәүче, шушы көннәрдә бергә гомер кичерүләренең 60 еллыгын – җәүһәр туйларын билгеләп үтүче Марс һәм Мәрьям Шәймөхәммәтовлар да – шундыйлардан. Тик аларның эчке дөньялары хис һәм күңел нечкәлеге белән тулы булу сәнгатькә карата мәхәббәтле булудан гына түгел, ә балачак, үсмер һәм яшьлек елларының гаҗәеп авыр сугыш һәм аннан соңгы елларга туры килүеннән дә.
