Илкүләм проектлар ярдәмендә 78 белем бирү оешмасына компьютерлар кайтарылды

Мәгариф өлкәсендәге илкүләм проектларны гамәлгә ашыру ярдәмендә Татарстан республикасының 78 белем бирү оешмасы заманча укыту һәм компьютер җиһазлары белән тәэмин ителде. 

Республикада илкүләм проектларның үтәлешен күзәтеп торучы ТР Икътисад министрлыгы хәбәр иткәнчә, үзган ел авыл һәм кечкенә шәһәрләрдәге 42 мәктәптә «Үсеш ноктасы» үзәге ачылды. Бу уңайдан мәктәпләрнең матди-техник базасы ныгытылды.

Моннан тыш Арча, Алексеевск, Яшел Үзән, Кама Тамагы, Мамадыш, Минзәлә районнарындагы авыл мәктәпләрендә 6 спортзалга ремонт ясалды.

Шулай ук 2020 елда «Торак һәм шәһәр мохите» илкүләм проекты буенча Казанда һәм Питрәч районында ике белем бирү учреждениесе ачылды. «Мәгариф» илкүләм проекты буенча Казанның Җиһанов һәм Бондаренко урамнарында ике мәктәп сафка бастырылды. 

Мәгълүм булганча, 2018 елның маенда Россия Президенты Владимир Путин «2024 елга кадәр чорга Россия Федерациясен үстерүдә илкүләм максатлар һәм стратегик бурычлар турында»гы указга кул куйган иде. Илкүләм проектларны гамәлгә ашыруга шул вакытта старт бирелде.

Чыганак: https://tatar-inform.tatar/news/science/15-03-2021/ilk-l-m-proektlar-yard-mend-78-belem-bir-oeshmasyna-kompyuterlar-kaytaryldy-5812410