Бүген “Мәктәпкә җыенырга ярдәм ит” акциясе кысаларында күп балалы, аз керемле гаиләләрнең беренче сыйныфка баручы балаларына мәктәп портфеле һәм уку кирәк-яраклары тапшырылды.
Аларны балаларга район башлыгы Фәрит Хөснуллин һәм хәйрия ярдәме күрсәткән оешма вәкиле Ирина Иванова тапшырдылар.
- Әлеге программа республикада 15 ел эшләп килә. Без бу көнне күп балалы, аз керемле гаиләләрнең беренче сыйныфка баручы балаларына уку кирәк-яраклары тапшырабыз. Бу акциядә катнашкан хезмәт коллективларына, оешма һәм предприятие җитәкчеләренә, эшмәкәрләргә зур рәхмәтемне җиткерәм. Ә балаларга тырышып укуларын, тәртипле, тырыш булуларын, яхшы укулары белән әти-әниләрен сөендереп кенә торуларын телим! – диде Фәрит Хөснуллин, катнашучыларны бәйрәм белән тәбрикләп.
Балаларны беренче сыйныфка барулары белән Ирина Геннадьевна да котлады.
- Бүген безнең алдыбызда республикабызның булачак президентлары, актрисалар басып тора. Без аларга “5” легә генә укуларын, үз алларына куйган максатларына ирешүләрен, республикабызның чын патриотлары булуларын телибез! – диде ул.
Бүген мәктәп портфеле 62 балага тапшырылды, бүләккә бу портфельне барлыгы 85 бала алды.
Нет комментариев