“Тәүфыйк” мәчетендә остаханә эшләячәк

Моңа кадәр мәчет эчендә оештырылган түгәрәккә йөрүче балалар өчен яңа мөмкинлекләр ачылды.
- Егетләр һәм кызлар аерым вакытларда шөгыльләнәчәкләр. Ир балалар агачтан, тимердән, пластиктан төрле әйберләр, җиһазлар ясарга һәм ремонтларга, төрле төзелеш һәм төзекләндерү, электрик, эретеп ябыштыру һәм башка эшләргә өйрәнсәләр, кызларны тегәргә, бәйләргә, аш-суга, чүлмәк ясау кебек һөнәрләргә өйрәтәчәкбез. Һәр һәнәрнең үз остазы булачак. “70 һөнәр иясе нинди сыйфатларга ия булырга тиеш?” – дигән сорауга җавап итеп, логотип янына шул сыйфатларны яздык. Иң беренче чиратта, бала иманлы булырга тиеш. Тәрбиянең нигезе – иман, әдәп, ата-анага хөрмәт. Андый кеше – ул ышанычлы, максатчан, белемле, көчле, тырыш, сабыр, зирәк, тәвәккәл. Кулы һөнәр белү кенә түгел, ә нәкъ менә шушы сыйфатларга да ия булырга тиеш бала. Монда бала коллектив белән эшләргә өйрәнә, эгоизм дигән нәрсә юкка чыгарга тиеш. Башкаларга карата хөрмәт, исраф итүгә каршы көрәш, хезмәтне хөрмәт итү, кадерләү кебек сыйфатлар да тәрбияләү - безнең максат, - диде мәчетнең имамы Илнур хәзрәт Сабуров.