Урта Кәшердә яшәүче Гайфуллиннарны алтын юбилейлары белән котладылар

Алтын юбилярларны җирлек җитәкчелеге дә тәбрикләде.
Гаилә башлыгы нефтьче хезмәте башкарган. Ә Тәскирә апа җирлектә төрле эшләрдә хезмәт куйган. “Бригадир да булды, клуб мөдире вазифаларын да башкарды, агрофирмада пешекче дә булып эшләде. Киңкырлы хезмәт иясе ул”, - дип мактады үзен җирлек башкарма комитеты секретаре Ләйсәнә Баһманова.
Бүгенге көндә дә актив тормыш белән яшиләр ветераннар. Мал-таур асрыйлар, умарталар тоталар. Уллары тырышлыгы белән салынган “Илдус” мәчетендә дә күп хезмәт куялар алар. Корбан ашлары үткәрүдә, җомга намазларын оештыруда да өлешләре зур. Онык-оныкчыклар шатлыгы киләчәктә яшәү көче өстәсен үзләренә, тигез, сәламәт, бәрәкәтле гомер насыйп итсен.