Түбән Камада «Совитал» суыткыч җиһазлары заводы ачылды

«Совитал» заводы ритейл һәм җәмгыять туклануы өлкәсе өчен суыткыч җиһазлары чыгарачак. Бу хакта «Татар-информ» МА хәбәр итә.

Тантанада шулай ук РФ Сәнәгать һәм сәүдә министры урынбасарлары Михаил Юрин һәм Альберт Кәримов катнашты.

Проектның төп саннары:

 * 1 млрд сум — инвестицияләрнең гомуми күләме.

 * 50 000 данә — елга чыгарыла торган продукция куәте (алга таба 100 меңгә җиткерү планлаштырыла).

 * 119 эш урыны булдырылган (киләчәктә 200гә кадәр артачак).

 * 65% тан артык — җитештерүне локальләштерү дәрәҗәсе.

«Завод кыска вакыт эчендә төзелде һәм илебезнең технологик лидерлыгына, сәнәгать тотрыклылыгына зур өлеш кертте», — дип билгеләп үтте Рөстәм Миңнеханов.

Проект Сәнәгатьне үстерү фонды ярдәме белән тормышка ашырылды. Фонд заманча җиһазлар сатып алу өчен 295 млн сум күләмендә ташламалы алыш (займ) биргән. Заводта тулы цикллы җитештерү — металл кисүдән алып әзер продукция чыгаруга кадәр җайга салынган.

«Совитал» заводы «Түбән Кама» сәнәгать паркының 16 нчы резиденты булды. Шундый ук эш сәфәре кысаларында Татарстан Рәисе микрофибра җитештерүче «Бикотекс» заводында да булды.