Татарстанда хатын-кызларга нинди ярдәм чаралары каралган?

Студент әниләргә, бала көтүчеләргә һәм күп балалы гаиләләргә нинди түләүләр каралган? Бу хакта «Татар-информ» МА хәбәр итә.

1. Йөклелек һәм бала табу буенча пособие (декрет түләүләре)

2025 елның сентябреннән көндезге бүлектә укучы студент кызлар өчен (вуз, колледж яки фәнни оешма булсынмы) декрет акчасын исәпләү тәртибе үзгәрде. Хәзер түләү күләме укуның бюджет яки түләүле булуына карамый, ә төбәктәге эшкә яраклы халык өчен билгеләнгән яшәү минимумына бәйле.

Декрет ялының озынлыгына карап түләү күләмнәре:

 * 96 338 сум — гади бала табу очрагында (140 көнлек ял);

 * 107 348 сум — катлаулы бала табу очрагында (156 көн);

 * 133 497 сум — игезәкләр туганда (194 көн).

 Мөһим: Гаризаны йөклелекнең 30 атнасыннан (игезәкләр көткәндә 28 атнадан) башлап бирергә мөмкин.

2. Бала көтүче хатын-кызлар өчен бердәм пособие

Бу пособие кереме аз булган һәм медицина учреждениесенә иртә срокта (12 атнага кадәр) исәпкә баскан хатын-кызларга билгеләнә.

Төп шартлар:

 * Гаилә кереме: Кеше башына туры килгән керем яшәү минимумыннан артмаска тиеш.

 * Минималь керем кагыйдәсе: Эшкә яраклы һәр гаилә әгъзасының елына ким дигәндә 8 МРОТ күләмендә кереме булырга тиеш (яки керем булмауның хөрмәтле сәбәбе: бала карау, уку, дәвалану һ.б.).

 * Мөлкәтне бәяләү: Гаиләнең милкендә берничә фатир, дача яки автомобиль булуы түләүдән баш тартуга сәбәп булырга мөмкин.

Түләү күләме — яшәү минимумының 50%, 75% яки 100% тәшкил итә.

3. Бала тугач бер тапкыр бирелә торган пособие

2026 елның 1 февраленнән бу түләүнең күләме — 28 450 сум. Гаиләдә берьюлы берничә бала туса, пособие һәр сабыйга аерым түләнә. Гаризаны бала туганнан соң 6 ай эчендә бирергә кирәк.

4. Бала 1,5 яшькә җиткәнче аны карау буенча айлык пособие

Бу пособиены баланы караучы теләсә кайсы туганы (әнисе, әтисе, әбисе яки бабасы) рәсмиләштерә ала.

 * Күләме: Соңгы ике еллык уртача хезмәт хакының 40 проценты.

 * Минималь һәм максималь чикләр (01.02.2026 дан): иң азы — 10 837 сум, иң күбе — 83 021 сум.

 * Яңалык: Хәзер ата-ана бала 1,5 яшькә җиткәнче эшкә чыкса да, бу пособие тулысынча түләнә бара.

5. «Герой-ана» исеме һәм ярдәм чаралары

10 һәм аннан да күбрәк бала тәрбияләп үстергән хатын-кызларга бирелә торган иң югары дәүләт бүләге.

 * Бертапкырлы түләү: 1 миллион сум.

 * Айлык түләү (01.01.2026 дан): 72 403 сум.

 * Пенсиягә өстәмә: 36 500 сум.

Шулай ук түбәндәге льготалар каралган:

 * Даруларны бушлай алу һәм теш протезлау.

 * Коммуналь хезмәтләр (ТКХ) өчен түләмәү.

 * Бушлай җир участогы алу мөмкинлеге.

 * Шәһәр һәм шәһәр яны транспортында бушлай йөрү.

Кая мөрәҗәгать итәргә?

Сарман районында яшәүчеләр гаризаны «Госуслуги» порталы аша, яисә МФЦ (Күпфункцияле үзәк) һәм Социаль фонд бүлекчәләренә барып бирә ала.