Татарстанда кыргый хайваннарны кышкы исәпкә алу башланды

Бу эшкә егерьлар, ау хуҗалыклары хезмәткәрләре, җәмәгать инспекторлары һәм тәҗрибәле аучылар кереште.

Чара 15 мартка кадәр дәвам итәчәк. Шул вакыт эчендә белгечләргә, популяцияләр санын бәяләү өчен, 1,5 меңгә якын маршрутны үтәргә туры киләчәк. Исемлектә — имезүчеләрнең һәм кошларның 19 төре бар.

Исәпкә алу барышында поши, кыр кәҗәсе, кабан, боланнар, селәүсен, бүре, төлке, куяннар, сусар, тиен, көзән, ас һәм корсак кебек хайваннар барланачак. Шулай ук кошлар да исәпкә алына: чыршы тавыгы, көртлек, боҗур һәм соры партлавык.

Эш барышы ничек оештырыла?

Гадәттәгечә, исәпкә алу чаңгыларда башкарыла:

 * Белгечләр хайваннарның кардагы эзләрен билгелиләр.

 * Очраган кошларның санын визуаль рәвештә билгеләп баралар.

 * Җәнлекләрнең тәүлеклек активлыгы исәпкә алына.

 * Җыелган мәгълүматлар җентекле математик анализ үтә.

Бу масштаблы эш нәтиҗәләре ау ресурсларының һәм аларның яшәү мохитенең торышы турында төгәл мәгълүмат алырга мөмкинлек бирә. Бу мәгълүматлар популяцияләрне саклау һәм торгызу буенча нәтиҗәле чаралар планлаштыру өчен кирәк.