Татарстанда ел башыннан 244 гаиләгә балалар җыелмасы тапшырылган

Аларның 68е махсус хәрби операциядә катнашучыларның гаиләләренә тапшырылган. Бу төр ярдәм республикада яшәү минимумыннан түбәнрәк кереме булган гаиләләргә каралган һәм бала тудыру йортыннан чыккан көнне үк бирелә.

ТР Хезмәт, халыкны эш белән тәэмин итү һәм социаль яклау министрлыгы белдерүенчә, бүләк җыелмасына сабый өчен иң кирәкле әйберләр керә. Анда трансформер-комбинезон, кокон-мендәр, киез итек, сырган юрган, махра җыелмасы, подгузниклар, пеленкалар, кер юу порошогы, сабын, гель-шампунь һәм тән өчен кремнар бар. Балалар өчен кирәк-яраклар тапшыру «Гаилә» илкүләм проекты максатларына ярашлы рәвештә башкарыла.