Татарстанда 2,5 мең гектардан артык мәйданда урманнар торгызылачак

Барлыгы 2 550 гектар мәйданда урманнар торгызылачак, шуның 1 200 гектары «Экологик иминлек» илкүләм проекты кысаларында башкарылачак.

Бу хакта ТР урман хуҗалыгы министры урынбасары Илгизәр Зарипов хәбәр итте. План буенча эшләр берничә юнәлештә алып барылачак:

 * 1 200 гектарда — яңа урман культуралары утырту;

 * 1 348 гектарда — табигый торгызуга ярдәм итү;

 * 2 гектарда — катнаш торгызу эшләре.

 «Без урман байлыкларын арттыру буенча системалы эшне дәвам итәбез. Орлыклар әзерләүгә һәм питомникларда сыйфатлы үсентеләр үстерүгә аерым игътибар биреләчәк», — дип белдерде Илгизәр Зарипов.

Белгечләр хәзер үк эшкә керешкән: бүгенге көндә ылыслы агачларның орлыкларын җыю һәм эшкәртү бара. Илкүләм проект кысаларында барлыгы 11,5 тоннадан артык орлык җыю, шулай ук махсус техника сатып алу да планлаштырыла.

Мәгълүмат өчен: соңгы биш ел эчендә республикада 17,5 мең гектарда урман торгызылган.