«Сыналган сугышчылар»: Татарстан атлары алгы сызыкка юллана

Хайваннар мөһим бурычларны үтәү өчен республика территориясендә махсус әзерлек узган.
Атлар җирлекне патрульләү һәм техника үтә алмаслык урыннарда кирәкле йөкләрне ташу өчен кулланылачак. Аларның төп өстенлеге — югары маневрлылык һәм иң үткенсез районнарда да үтә алу сәләте.
Татар токымлы сигез аттан торган бу партияне махсус гуманитар йөк дип атыйлар. Хайваннарны Казан, Арча, Теләче һәм Лениногорск районнарының алдынгы ат асраучылары тапшырган.
Казан ипподромы директоры Гияз Идиятуллин билгеләп үткәнчә, бабаларыбыздан калган бу тарихи токым үзе өчен таләпчән булмавы, чыдамлыгы һәм суыкларга бирешмәве белән танылган. Мондый атлар катлаулы тәрбия таләп итми һәм спорттан алып иппотерапиягә кадәр төрле өлкәләрдә үзләрен яхшы яктан күрсәткәннәр.
«Казан ипподромында татар токымлы атлар яшь жокейларны күнектерергә ярдәм итә. Бу — сыналган сугышчылар», — дип өстәде Идиятуллин.
Хайваннарны ташу барлык нормаларга яраклаштырып оештырылган: алар махсус транспортта бара, юл дәвамында азык һәм су белән тәэмин ителгәннәр.
СВОда катнашучылар сүзләренчә, бу атлар азык-төлек һәм сугыш кирәк-яраклары җиткерүдә алыштыргысыз ярдәмче булачак, ә аларның табигый сизгерлеге куркынычлардан качарга ярдәм итәчәк, дип хәбәр итә «Татар-информ» МА.

Фото: © «Татар-информ», Роман Баданов