С гепатитына каршы Бөтендөнья көрәш атналыгы бара

Бавыр бу вируслар белән зарарланган очракта бавыр циррозы hәм рагы килеп чыгарга мөмкин, ә бу авырулар күп очракта кешене үлемгә китерәләр. Сарман үзәк хастаханәсенең табиб-эпидемиологы Илүс Вахитов киңәшләре сезгә әлеге авырудан сакланырга ярдәм итәр.

Бөтендөнья Сәламатлек саклау Оешмасы мәгълүматларына караганда, бу вируслар ВИЧ вирусына караганда кеше организмын 50-100 тапкыр ешрак зарарлыйлар. 

С гепатиты вирусы кеше организмына кан hәм башка биологик сыекчалар аша керә, бигрәк тә медицина белан бәйле булмаган процедуралар үткәргәндә, әйтик, бер үк шприц белән берничә кешегә наркотик матдәләр керткәндә (бу – иң күп очрак), татуировка ясаганда, төрле косметологик процедуралар (педикюр, маникюр hәм башкаларны) үткәргәндә. Мондый процедураларны ясаганда, күпчелек легаль булмаган салоннарда бер тапкыр гына кулланыла торган инструментлар кулланылмый, ә, бәлки, процедура бер үк инструмент белән берничә кешегә ясала. Мондый очракларда инструментлар бик төгәл итеп зарарсызландырылырга тиеш, ә бу күп очракта үтәлми, нәтиҗәдә С гепатиты бер кешедән икенче кешегә йогарга мөмкин. Кеше организмын зарарлау өчен бик аз микъдарда булган вирус та җитә. Канга эләккәч, вирус бик тиз үрчи башлый, бавырны нык зарарлый, нәтиҗәсе үлем очрагына китерергә мөмкин. Шунсын да әйтеп китәргә кирәк, вирус тиешенчә зарарсызландырылмаган инструментта шактый озак яшәргә сәләтле. Җенси юл hәм анадан балага күчү очраклары да булырга мөмкин. 

С гепатитының төп таралу юлы – кан аша, ул башка биологик сыекчалар аша азрак очракта күчә. В гепатитыннан аермалы буларак, С гепатитында гомерлек иммунитет барлыкка килми, шуңа күрә дә кабат зарарлану очраклары да күзәтелергә мөмкин. В гепатитына каршы яхшы нәтиҗәле вакцина уйлап табылды hәм хәзерге вакытта уңышлы кулланыла. С гепатитына каршы вакцина юк. 

Зарарлану куркынычы зур булган төркемгә кемнәр керә соң? Болар: 

• Бер шприц белән наркотик кулланучылар hәм аларның җенси партнерлары; 
• Коммерцияле җенси хезмәт күрсәтүчеләр hәм аларның җенси партнерлары; 
• Бер үк җенес белән җенси мөнәсәбәткә керүчеләр; 
• Тәртипсез җенси тормыш алып баручылар; 
• Татуировка ясатучылар; 
• Легаль булмаган косметология салоннарына йөрүчеләр. 

Саклану чаралары – түбәндәгеләр:  

- Бер тапкыр гына кулланыла торган шприцларны гына куллану; 

- Билгесез яки шикле кеше белән җенси мөнәсәбәткә кергәндә саклану чаралары, әйтик. презерватив куллану; 

- Чит кешеләар куллана торган бритвалар, теш щеткасы, сөлгеләрне кулланмаска, аларда кан кисәкләре калырга мөмкин, ә алар үзләрендә вирусларны шактый озак саклыйлар; 

- Лицензиясе булган легаль косметология салоннарына гына йорергә; 

- Татуировка ясаткан очракта дезинфекция hәм стерилизация чаралары үткәрелгән инструментлар гына куллануны таләп итәргә, ә иң яхшысы аларны бөтенләй ясатмаска; 

- Шәхси гигиена кагыйдәләрен сакларга. 

Авыруга шик булган очракта кичекмәстән табибка мөрәҗәгать итәргә кирәк. Хазер гепатитларны давалау өчен бик яхшы препаратлар бар, еш кына башлангыч стадиядә үк аларны уңышлы дәвалап була.