Районда «Автоледи — 2023» бәйгесе җиңүчесе ачыкланды

"Сарман: иң яңа хәбәрләр", 7 июль 2023 - 11:02

1665

Бүген Сарманда районның машина йөртүче хатын-кызлары арасында «Автоледи — 2023» бәйгесе үткәрелде.

Ул ЮХИДИнең район бүлекчәсе, «Юл хәрәкәте иминлеге» дәүләт бюджет учреждениесе Әлмәт территориаль идарәсенең Сарман районы буенча профилактика бүлекчәсе, ДОСААФның район бүлеге көчләре белән оештырылды. Катнашучылар ике төрле ярышларда көч сынаштылар — «Юл кагыйдәләре белгечләре» (В категорияле билет сораулары буенча) һәм «Транспорт чарасын автошәһәрчектә йөртү».
Нәтиҗәдә бәйгенең җиңүчесе булып Флүзә Хаҗиева танылды. Эльвира Андриянова — икенче, Венера Сәетшина өченче урыннарга лаек булдылар (барысы да — Сарман авылыннан). Аерым номинацияләрдә җиңүчеләр дә булды. Катнашучыларны район Башкарма комитеты җитәкчесе Фәндәс Вәлиев, район ЮХИДИ бүлекчәсе начальнигы вазифаларын вакытлыча башкаручы Раил Таҗетдинов, Сарман районында «Юл хәрәкәте иминлеге» дәүләт бюджет учреждениесе бүлекчәсе начальнигы Алсу Ситдыйкова, ДОСААФның территориаль бүлеге җитәкчесе Альберт Хаҗиев, «Бердәм Россия» сәяси партиясенең Сарман җирле бүлекчәсе башкаручы сәркатибе Айназ Сафина тәбрикләделәр, аларга дипломнар, кубоклар, истәлек бүләкләре тапшырдылар.