Чаллы табиблары кара елан тешләгән ир-атны коткарып калган

Витаминлы аш урынына — хастаханә 

Хәл Бакчасарай авылында булган. Газинур Исламов бәрәңге бакчасы артында витаминлы аш өчен кычыткан җыйганда, кулына нәрсәдер кадалганын сизә. Башта ул моны коры ботактыр дип уйлый, тик соңрак куак астына кереп качкан кара елан койрыгын күреп ала.

Симптомнар бик тиз үсә:

 * Кул оеп бара;

 * Көчле әрнү башлана;

 * Кул шешеп, кызарып чыга.

Табибларның осталыгы

Газинурның кызы кулына боз куеп, бәйләп куя, тик хастаханәгә барганда ир-атның хәле кискен начарлана: тын алуы авырлаша, кан басымы күтәрелә. Хастаханәгә ул инде авыр хәлдә килеп җитә. Елан агуыннан тыш, анда Квинке шеше (көчле аллергия) башланган була. Моннан тыш, табиблар ир-атның муеныннан талпан да тапканнар.

Медицина хезмәткәрләре аңа агуга каршы дару кертәләр, талпанны алалар һәм аллергияне басалар. Бер атнадан соң Газинур Исламовны терапия бүлегенә күчергәннәр.

«Сезнең ярдәм белән мин исән калдым. Осталыгыгыз өчен рәхмәт сезгә!» — дип белдерә коткарылган ир-ат.

Мөһим: елан тешләсә, нәрсә эшләргә ярамый?

Татарстан Сәламәтлек саклау министрлыгы кисәтә:

 1. Ярадан агуны суырырга ярамый.

 2. Кулны яки аякны каты итеп бәйләргә (жгут салырга) ярамый.

 3. Үз белдегең белән генә дәваланырга ярамый.

Елан тешләгән очракта тиз арада ашыгыч ярдәм чакырырга яки хастаханәгә барырга кирәк.

Фото: ТР Сәламәтлек саклау министрлыгы матбугат хезмәте

«Татар-информ» МА материаллары буенча