Баланың тешләре турында карында чакта ук кайгырт

Шуңа күрә баланың тешләре турында ул карында яткан чакта ук кайгыртырга кирәк. Югары категорияле теш табибы Алсу Шәймөхәммәтова баланың тешләрен сәламәт итү серләрен ача. 

Йөклелек – ул яңа тормыш көтү. Бу чорда һәр хатын-кыз үз сәламәтлеген дә, туачак баланыкын да кайгыртырга тиеш. 

Йөклелек вакытында хатын-кыз организмында гормональ үзгәрешләр башлана һәм, нәтиҗә буларак, кариес һәм периодонт авыруларының интенсивлыгы арта. Шуңа күрә бу чорда теш авыруларын кисәтүгә аерым игътибар бирергә кирәк. Хатын-кызга теш табибына йөклелекне планлаштыру этабында ук мөрәҗәгать итәргә һәм, кирәк булганда, авыз куышлыгын тулысынча санацияләргә (кариеслы тешләрне дәваларга, дәвалау мөмкин булмаганнарын алдырырга) киңәш ителә. Әгәр планлаштыру этабында барып чыкмаса, моны йөклелек факты ачыкланганнан соң ук эшләргә кирәк.

Беренче карау вакытында табиб авыз куышлыгының гигиена дәрәҗәсен, авырулар килеп чыгу куркынычы факторларын, дәвалау кирәклеген билгеләячәк һәм индивидуаль гигиена чараларын сайлаячак. Теш табибына йөклелекнең 9 аенда – 6-8, 16-18, 26-28, 36-38 нче атналарда дүрт тапкыр күренергә кирәк. Әгәр дә кариес яки периодонт система тукымалары зарарлану куркынычы факторлары булса, тикшерүләр саны арта.

Тешләрне планлы дәвалау икенче триместр вакытында (йөклелекнең 4-7 нче аенда) үткәрелә. Хроник авырулар кискенләшкән очракта, теләсә кайсы срокта дәваланырга мөмкин. Авыз куышлыгының профессиональ гигиенасын йөклелек вакытында гадәттәгегә караганда ешрак (3 айга бер тапкыр) үткәрергә киңәш ителә, чөнки, гормональ фон үзгәрү сәбәпле, төкерекнең үзлелеге арта, бу тешләрдә кариес барлыкка килү өчен өстәмә шартлар тудыра.

Теш табибына даими килеп йөрүдән тыш, авыз куышлыгын карау буенча көндәлек профилактик чаралар да башкарырга кирәк: көненә ике тапкыр (иртән һәм кичен) тешләрне 3 минут дәвамында чистарту; фторлы теш пасталары, өстәмә гигиена чаралары (флосслар, ирригаторлар, тел өчен кыргычлар, теш эликсирлары) куллану зарур.

Йөклелек вакытында ананың сәламәтлеге баланың тешләре үсешенә йогынты ясый. Йөклелекнең 4-5 нче атнасында яралгының казналык сөякләре һәм битнең йомшак тукымалары формалаша. Йөклелекнең 6-10 нчы атнасында барлык сөт тешләренең яралгылары барлыкка килә. Йөклелекнең 17-18 нче атнасында даими тешләрнең яралгылары салына башлый. Аларның минеральләшүе йөклелекнең 20 нче атнасыннан башлана, тешләрнең тулысынча формалашуы алар чыкканнан соң берничә елдан соң гына тәмамлана. 

Профилактиканың тагын бер мөһим өлеше – баланслы диета. Туклану – төрле, витаминнар һәм микроэлементлар кирәкле микъдарда булырга тиеш. Йөклелекнең беренче яртысында хатын-кыз организмы өзлексез аксым керүгә мохтаҗ. Икенче яртысында витаминнарга, микроэлементларга һәм минераль тозларга ихтыяҗ арта. Яшелчәләр, җиләк-җимешләр азык рационының даими ингредиентлары булырга тиеш. Шулай ук үз рационыңа эремчек, сыр, чикләвек кертергә кирәк. Витаминнарның төп чыганаклары – туклану продуктлары, шулай да табиб билгеләгән поливитамин препаратларын кабул итәргә кирәк була.