Унбиш яшьлек укучы физкультура дәресеннән соң үлгән

Чувашиянең Новочебоксарск шәһәрендәге кадет лицеенда укучы 15 яшьлек укучы физкультура дәресеннән соң үлгән. Аның сәламәтлеге белән проблемалары булган, дип хәбәр итә республиканың тикшерү идарәсе.

Сәламәтлеге белән проблемалар булса да, яшүсмер егет физкультура дәресләрен калдырмаган. Тикшерүчеләр хәзер укытучылар ни өчен бу хәлгә юл куйган дигән сорауга җавап эзли. Мәктәптә балага ашыгыч рәвештә ярдәм күрсәтә алмаганнар - монысы да күп сораулар тудыра.

Бала сырхауханәдә күзәтүдә торган, тикшерүчеләр табибларның да эшчәнлегенә бәя бирәчәк.

Чувашия газеталары мәктәптә балалар үлми калган бер ел да юк дип яза. 2020 елның мартында Чабаксарда 13 яшьлек кыз бассейнда йөзгәндә үлә. Ул кисәк кенә үзен начар хис итә башлый, табиблар килгәндә инде үлгән була.

2019 елда БДИ тапшырганда 18 яшьлек кыз үлә. Хроник авырулары булу сәбәпле инвалид булган кыз имтихан башланганчы ук үзен начар хис итә. Әмма ул имтиханга керергә теләвен әйтә, 18 яшь булу сәбәпле, аңа каршы килмиләр. Кызны баскычтан күтәреп диярлек алып менәләр. Бер сәгатьтән ул бәдрәфкә дип чыгып китә һәм коридорда егылып үлә.

ЧЫГАНАК: https://intertat.tatar/news/incident/10-04-2021/unbish-yashlek-ukuchy-fizkultura-d-resenn-n-so-lg-n-5818773

ФОТО:https://pixabay.com/ru/