Гөлназ ханым бакчасында чөгендер уңган

Дөрес, бездә җирләр кара туфраклы, уңдырышлы. Әмма быелгы коры, аз уңышлы елда бу чөгендер хакында рекордсмен дип әйтергә дә буладыр. Аның төгәл авырлыгы - 1654 грамм. Менә бит, булган кешенеке булган.
- Әле аның тагы да зурраклары бар иде. Монысын иң матуры булганга алып килдем. Кечкенә кызым утырткан иде, каравын да ул карады. Кишерләребез дә бик уңды, - ди Гөлназ ханым.
“Чөгендерне ничек файдаланасыз?” – дигән соравыма ул чөгендер икрасы рецептын тәкъдим итте. “1993 елдан бирле ясыйм, бик яратып ашыйбыз, аеруча кара ипи белән тәмле”, - диде ул.

Шулай итеп, сезгә Гөлназ ханымнан – чөгендер икрасы рецепты, хөрмәтле төркемдәшләр!
Икра өчен 2 кг чөгендер, 3 кг помидор, 1 кг кишер, 1 кг суган, 0,5 кг болгар борычы алабыз, иттарткычтан чыгарабыз. Тәменчә тоз, 1 чәй калагы төелгән кызыл борыч, 0,5 стакан уксус (азрак та мөмкин) салабыз. 45 минут пешерәбез һәм стерильләштерелгән банкаларга тутырып, каплап куябыз.

Зөлфия Шәрипова язмасы, фотолар – Зөлфия Шәриповадан һәм Гөлназ Хафизова архивыннан