Кагыйдәләрне үтәсәләр, сарманлылар йөз яшькә кадәр яши алачаклар

Беренчесе — тиешенчә йоклагыз. Йокының озынлыгы кешенең шәхси ихтыяҗларына бәйле. Шулай да, тәүлегенә ким дигәндә җиде сәгать йокларга тырышырга кирәк.

Икенчесе — дөрес тукланыгыз. Аксым һәм клетчатларга бай ризыкларга өстенлек бирү мөһим. Монда яшелчә һәм җиләк-җимеш керә. Рационга көрпә, йогырт, чикләвек тә керергә тиеш.

Өченчесе — йөрәгегез турында кайгыртыгыз. Утыз яшьтән соң, ул сезне борчымаса да, ел саен электрокардиограмма үтү мәҗбүри.

Дүртенчесе — дөрес авырлыкны саклагыз. Артык килограммнарыгыз булса, аларны юк итү өстендә эшләргә кирәк.

Бишенчесе — чыныгыгыз. Нинди генә көн булмасын, саф һавада йөрергә тырышыгыз. Кызу көннәрдә үз куркынычсызлыгыгыз турында да онытмагыз.

Алтынчысы — хәрәкәтләнегез. Ялкаулыкны җиңегез. Шәһәрдә яшәсәгез, лифттан баш тартыгыз. Бик еракка барасы булмаса, җәяү йөрегез.

Җиденчесе — артыгын эшләмәгез. Ялкаулыктан баш тартсагыз да, бу төнгә кадәр эштә утырырга яки эшне өйгә дә алып кайтырга кирәк дигән сүз түгел.

Сигезенчесе — даими рәвештә табибларда тикшеренү үтегез. Вакытында ачыклансалар, күп кенә чирләрне җиңәргә мөмкин.

Тугызынчысы — зарарлы гадәтләрдән баш тартыгыз. Мисал өчен, тәмәке тарту гомерне ун елдан да күбрәккә кыскарта. Зарарлы гадәтләре булмаган яки алардан арынган кеше сәламәт һәм матур була.

Унынчысы — бәхетле булыгыз. Бәхетле кешеләр һәр көнне елмаюга, көлүгә вакыт табалар. Бу уңай хисләр бирә, психологик халәтне тынычландыра, бит өчен менә дигән гимнастика булып санала.

("Гаилә календаре"ннән)

Рәсем – ru.freepik.com сайтыннан