Районнан җиде мөселман кардәш ТР "Ихлас" мөселман хатын-кызлары җәмгыятенә кунакка барды

Әле яңа гына башланган кебек иде изге Рамазан ае, инде тәмамланып та килә икән. Бу айда Сарманда авыз ачу мәҗлесләре үтеп тора: "Җәмигъ" мәчетендә - көн саен (анда 150-200 ләп кеше килә), "Тәүфыйкъ" мәчетендә - көн аралаш (70-80 ләп кеше йөри). Авылларыбызда да ифтарлар уздырыла. Аллаһының биргәненә шөкер.

Бер кичтә без - җиде мөселман кардәш Әлмәт шәһәрендәге Татарстан Республикасы "Ихлас" мөселман хатын-кызлары җәмгыятенә кунакка бардык. Анда да ифтар мәҗлесе үткәрелде. Бу зур бинада "Тәзкирә" мәчете, мәдрәсә, берничә бүлмәдән торган мөселман бәйрәмнәре үткәрү өчен зал, кафе, хәләл кибет, хәзрәтләрнең эш бүлмәләре, хатын-кызлар өчен фитнес бүлмәсе урнашкан. Авыз ачу ашына 100дән артык кеше килгән иде.

Мондый зур күләмле, җаннарыбызга пакьлек, якты иман нуры өстәүче күркәм мәҗлесне безнең районның Күтәмәле авылында туып-үскән Фәрит Ханнанов, аның хатыны Рәйхана апа үткәрделәр. Аллаһының ярдәме булсын һәм рәхмәте яусын аларга.

Аллаһы Тәгалә шулай озак еллар исәнлектә бергә күрешеп яшәргә насыйп итсен. Амин.