8 октябрь 2016 яңалыклары
-
Җәлилдә ярминкә гөрләде
Бүген, 8 октябрь көнне, Җәлил бистәсендә чираттагы авыл хуҗалыгы продуктлары ярминкәсе үтте. Өстән яңгыр явып торуга карамастан, халык аңа бик теләп чыкты. Сөт, каймак, тавык һәм каз түшкәләре, йомырка беренче сәгатьләрдә үк алынып беткәндер, мөгаен. Тулырак язманы газетаның алдагы саннарында укыгыз.
-
Мортамак мәктәбендә Укытучылар көне үткәрелде
7 октябрь көнне Мортамак мәктәбендә Укытучылар көне билгеләп үтелде. Иң кадерле кунаклар итеп, мәктәптә бик күп еллар эшләп киткән өлкән укытучылар чакырылды. Укучылар, бәйрәм белән котлап, аларга иң матур теләкләрен җиткерделәр.
-
Зур Нөркәй укучылары укытучыларын котладылар
Зур Нөркәй урта мәктәбендә Укытучылар көне уңаеннан "Укытучыңны котла!" дип аталган акция үткәрелде. Шул уңайдан балалар "Кул эшләре илендә" түгәрәгендә түгәрәк җитәкчесе Зилия Флюровна җитәкчелегендә үз куллары белән укытучылары өчен открыткалар ясадылар, алар белән укытучыларын котладылар. Котлау открыткалары квилинг технологиясендә ясалды.