Район башлыгы Фәрит Хөснуллин Корбан бәйрәме белән тәбрикли

Хөрмәтле райондашлар, дин кардәшләребез!

Сезне ихластан иң олы һәм мөбарәк бәйрәмнәрнең берсе булган Корбан гаете белән котлыйм.

Ул, Ислам динендәге башка бәйрәмнәр кебек үк, күркәм эшләр кылуны, рухи чисталыкка ирешүне һәм гөнаһларыбызны ярлыкауны гәүдәләндерә. Әлеге бәйрәм бигрәк тә авыруларга, бәла-казаларга юлыккан мөселман кардәшләребезгә, олы буын вәкилләренә, ятимнәр һәм мохтаҗларга битараф калмаска, аларга игътибар һәм ихтирам күрсәтергә чакыра.

Хөрмәтле дин кардәшләребез! Изге Корбан бәйрәме көнендә матур ниятләребез һәм якты хыялларыбыз тормышка ашсын. Районыбызда яшәүче һәрбер гаиләгә, йортыбызга бәрәкәт, күңелләребезгә иман нуры, шәфкать һәм мәрхәмәт хисләре иңсен. Киләчәккә якты өмет белән, тынычлыкта, иминлектә яшәргә язсын. Гаетләребез – мөбарәк, табыннарыбыз – түгәрәк, чалган корбаннарыбыз кабул булсын!

Фәрит Хөснуллин, муниципаль район башлыгы