Зур Нөркәйдә мини-футбол кыры ачылды

Бүген Зур Нөркәй урта гомуми белем бирү мәктәбе территориясендә ачык мини-футбол кыры ачылу тантанасы үтте. Анда район башлыгы урынбасары Гүзәл Гәрәева, мәгариф бүлеге белгече Илдар Һадиев, яшьләр эше, спорт һәм туризм бүлеге җитәкчесе Илгизәр Гаделшин, авыл җирлеге башлыгы Рәшит Гайсин, мәктәп директоры Ләйлә Шәйхеразиева, укытучылар коллективы, укучы балалар, яшьләр эше, спорт һәм туризм бүлеге хезмәткәрләре һәм башкалар катнаштылар. Балалар концерт номерлары күрсәттеләр. Гүзәл Гәрәева һәм Рәшит Гайсин символик тасманы кистеләр, аннан соң җирлек башлыгы тупка беренче тибүне башкарды. Иптәшләрчә уен үткәрелде, укытучылар дәүләт программасы кысаларында яңартылган спорт залы белән таныштылар.