Соцфондның Татарстан бүлекчәсе гаилә түләве ничек исәпләнәсен аңлатты

Аның сүзләренчә, бу түләү — түләнгән НДФЛның бер өлешен кире кайтару. Монда төп шарт – рәсми керем алу һәм салым түләү факты, ә ел эчендәге эш вакытының озынлыгы төп роль уйнамавын белгеч ассызыклаган.

Түләү күләмен исәпләгәндә хезмәт хакы, эшкуарлык эшчәнлегеннән, крестьян-фермер хуҗалыкларыннан һәм шәхси практикадан керемнәр, гражданнар-хокукый килешүләр буенча түләүләр, авторлык гонорарлары, шулай ук хәрбиләрнең һәм көч ведомстволары хезмәткәрләренең акчалата тәэмин ителеше исәпкә алына. Әгәр кеше 12 айдан әзрәк эшләгән булса да, НДФЛ түләү шарты үтәлсә, ул түләүгә хокуклы.

Эдуард Вафин аңлатканча, түләү күләме шәхси характерда һәм алдагы елдагы керемнәрдән 13% ставка буенча исәпләнгән НДФЛ суммасы белән шул ук керемнән 6% ставка буенча исәпләнгән салым арасындагы аерманы тәшкил итә. Димәк, бу – узган ел өчен түләнгән салымның бер өлешен кире кайтару.