"Шигъри терапия": сезнең игътибарга Рухия Фәхразый кызы Ахунҗанованың шигырьләрен тәкъдим итәбез

Табигатьнең дә үз холкы..

Күрәсезме, бездә – кыш!

Ап-ак булган әнә тыш.

Дулаганнар бураннар,

Кар астында – урамнар.

Кичә тып-тып тамчы тамып,

Кояш көлде көн буе.

Ә бүгенгә сюрпризлар

Әзерләнгән төн буе.

Рухия Ахунҗанова

Бәбкә саклыйбыз без дә

Дәү әниләр белән бергә

Бәбкә саклыйбыз без дә.

Алар барында ата каз

Тия алмый шул безгә.

Бәбкәләрнең пип-пип килеп

Сөйләшкәнен тыңлыйбыз,

Куышабыз, су керәбез –

Бер дә эшсез тормыйбыз.

Казлар белән дус яшибез,

Бер дә килмибез сүзгә.

Ярыша-ярыша, җәй буена

Үсәбез күренеп күзгә.

Рухия Ахунҗанова

Яңа күлмәк

Минем әни – тегүче,

Келтерәп бара эше.

Мин дә тегәм күлмәкләр

Ул төшергән үрнәктән.

Теккән күлмәкләрем, дим,

Курчакка булсын таман.

Кисәм, ялгыйм... янә кисәм –

Төрле чарасын табам.

Курчак белән пар итеп

Күлмәк киеп алабыз.

Яңа күлмәк котлатырга

Дәү әнигә барабыз.

Дәү әниебез безне

Елмаеп каршы ала.

Икебезнең дә кесәгә

Тәмле кәнфитләр сала.