Сарманда Үзәк чыршыны ачу тантанасы узды

27 декабрьдә Сарман ял паркында Үзәк чыршыны ачу тантанасы булды. Муниципаль район башлыгы Нәфис Закиров җыелган халыкны Яңа ел белән тәбрикләде, 2013 елның нәтиҗәләре белән таныштырды. Универсиада утын каршылауга аеруча зур өлеш керткән сарманлыларга Мактау кәгазьләре тапшырды. Район үзәген Яңа ел бәйрәменә бизәүгә тырышлык куйганнар да бүләксез калмады. Аннан соң сүзне Кыш бабай белән Кар кызы һәм киләсе 2014 елның хуҗасы - Ат алдылар. Алар шулай ук котлау сүзләре ирештерделәр, изге теләкләрен белдерделәр, бүләкләр тараттылар. Шулай ук һәрбер агрофирмадан Кыш бабай белән Кар кызы чыгыш ясадылар. Бәйрәм концерт номерлары белән үрелеп барды.