Сарманда мини-футбол турниры оештырылды

Ул районның билгеле тарихчысы, яшь буында спортка карата мәхәббәт тәрбияләүче Наил Сафин истәлегенә багышланды һәм бишенче тапкыр үткәрелде. Турнирга аның якыннары – тормыш иптәше Регина Ганиевна, кызы Индира, бертуганы Камил, үзе тәрбияләгән спортчылары да килделәр.
Уеннар «Айтуган» спорт залында уздылар. Турнир хуҗаларыннан тыш, чарада Бөгелмә, Әлмәт, Яр Чаллы командалары да катнаштылар. Беренче ике урынны Әлмәт командалары яуладылар, өченче урынга Бөгелмә командасы лаек булды.
Призлы урыннар алучыларга кубоклар һәм грамоталар тапшырдылар. Турнир нәтиҗәләре буенча төрле номинацияләрдә иң яхшы булып танылган уенчыларны да билгеләп үттеләр.