“Салават күпере”ндә балалар күңелле ял итәләр

Сарман гимназиясе базасында ачылган “Салавпат күпере” лагеренда 40 башлангыч сыйныф укучысы ял итә. Ул 29 октябрьдә ачылып, балаларны 5 ноябрьгә кадәр ял иттерәчәк. 
- Лагерьга башлангыч сыйныфларның барлык теләгән укучылары йөри. Без шулай ук социаль яктан авыр гаиләләрнең балаларын да мөмкин кадәр күбрәк җәлеп итәргә тырыштык. Балаларны ике отрядка бүлдек. Алар биредә иртәнге зарядканы ясыйлар, иртәнге, көндезге, төштән соңгы ашлар каралган. Программабыз да кызыклы. Беренче көнне стена газеталары чыгарсак, кичә гимназиянең элеккеге директоры Мәүлидә Сибгатовнага багышланган сыйныф сәгате үткәрдек, - ди лагерь начальнигы Гөлнара Зарипова. 
Балалар өчен шулай ук рәсем һәм башка кызыклы конкурслар, хәрәкәтле спорт уеннары, музейга экскурсияләр һәм башка чаралар каралган. 
- Балалар лагерьга бердәм булып, кызыксынып йөриләр, - ди Гөлнара Маратовна.