Сабантуйга сөлге чиктегезме, райондашлар?

Борынгыдан калган гореф-гадәт кайбер җирлекләрдә әле дә булса сакланган. Сөлге чикмәсәләр дә, хәзер бүләкне һәркем әзерли. Бу - үзе бер матур күренеш. Гармун тартып, җырлап, биеп, урамнарны ямьләп узсалар, аеруча күңелле. Сабантуйда беркем дә бүләксез калмаска тиеш кебек. Кемдер йөгерә, көрәшә, чүлмәк вата, һөнәрен, осталыгын күрсәтә. Шушы көннәрдә район үзәгендә, поселокта, авылларда бүләк җыю йолалары үтәчәк. Хөрмәтле дуслар, сез дә бу чарадан читтә калмагыз.