Районда яшьләрне патриотик рухта тәрбияләү буенча җитди сөйләшү булды

Татарстан Республикасы Президенты Рөстәм Миңнеханов рәислегендә Президент каршында эшләп килүче милләтара һәм конфессияара мөнәсәбәтләр буенча Совет белән Россия Федерациясенең милләтара һәм динара мөнәсәбәтләр буенча Җәмәгать палатасының берләштерелгән утырышы узды. Әлеге мәсьәләләр буенча район комиссиясе членнары һәм җаваплы оешмаларның җитәкчеләре, вәкилләре аны видеорежимда карады. Утырышта яшьләрне патриотик рухта, гражданлык бурычын үтәү юнәлешендә тәрбияләүгә багышланган актуаль сораулар күтәрелде. Соңыннан район Башкарма комитеты җитәкчесенең социаль мәсьәләләр буенча урынбасары Индира Сәхипова, теманы дәвам итеп, районда бу юнәлештә алып барылган һәм планлаштырылган эшләргә тукталды, утырышта каралганнар буенча тәкъдимнәрен җиткерде, бурычлар билгеләде.