Район янгынчылары йортны саклап кала алганнар

Янгынчылардан алынган мәгълүматлардан күренгәнчә, бәйрәм, ягъни 1-8 январь көннәрендә, Иске Минзәләбаш авылында булган янгынны исәпкә алмаганда, районда хәл чагыштырмача имин булган, зур янгын очраклары күзәтелмәгән. Иске Минзәләбашка килгәндә, 2 январь көнне иртәнге бишләр тирәсендә берәүнең мунчасында янгын чыга. Сәбәбе - электр җиһазларын монтажлау кагыйдәләрен бозу. Бәла-каза урынына янгынчылар тиз арада килеп җитәләр. Оста һәм тиз хәрәкәт итү нәтиҗәсендә дөрләп янган мунчадан 4 метр ераклыкта гына төзелеп яткан йортны коткарып кала алалар. Янгынчылар сарманлыларны сак булырга, янгын куркынычсызлыгы таләпләрен төгәл үтәргә чакыралар.