Район башлыгы Фәрит Хөснуллин Җирле үзидарә көне белән котлый

Җирле үзидарә – элек-электән кешеләргә иң якын хакимият органы. Үзләрен борчыган проблемалары, сораулары белән халык, иң беренче чиратта, җирле хакимияткә мөрәҗәгать итә. Инициативалы, битараф булмаган кешеләрнең хезмәте, тәҗрибәсе, җаваплы карарлар кабул итеп, аларны уңышлы тормышка ашырулары нәтиҗәсендә безнең җирле үзидарә органнары үз эшчәнлеген дәвам итә. Бүгенге көндә җирле үзидарә органнарына территорияләрнең социаль-икътисади халәтен, халыкның тормыш шартларын яхшырту, аны тагын да уңайлы итү буенча зур җаваплылык йөкләнгән. Нәкъ менә шушы өлкә хезмәткәрләре көндәлек тормышта килеп туган проблемаларны чишүдә халыкка якыннан торып ярдәм итә.

Туган районыбыз һәм район халкының мәнфәгатьләрен кайгыртып күп еллар тырыш хезмәт куйган өлкә ветераннарына һәм бүгенге көндә үз бурычларын намус белән үтәүче барлык җирле үзидарә органнары хезмәткәрләренә зур рәхмәтемне белдерәм.

Бәйрәм белән котлап, барыгызга да ныклы сәламәтлек, бәхет, шәхси тормышыгызда иминлек,  халкыбызга нәтиҗәле хезмәт итүдә көч-куәт, күңел көрлеге, рух ныклыгы телим.