Реклама
Җәмгыять
Янурыс авыл җирлеге почта таратучысы Ләйсирә Салихова "Иң яхшы авыл хат ташучысы" номинациясендә җиңде
"ТАТМЕДИА" җәмгыяте уздырган республикакүләм хат ташучылар конкурсында Янурыс авыл җирлеге почта таратучысы Ләйсирә Салихова "Иң яхшы авыл хат ташучысы" номинациясендә җиңүче булды. Аңа тантаналы рәвештә 20 мең күләмендә акчалата бүләк һәм башкалабызга ике кешелек күңелле сәяхәт сертификаты тапшырылды. Хат ташучылар, диюгә, никтер, күз алдына иңнәренә олы букча аскан, велосипедка атланган...
"ТАТМЕДИА" җәмгыяте уздырган республикакүләм хат ташучылар конкурсында Янурыс авыл җирлеге почта таратучысы Ләйсирә Салихова "Иң яхшы авыл хат ташучысы" номинациясендә җиңүче булды. Аңа тантаналы рәвештә 20 мең күләмендә акчалата бүләк һәм башкалабызга ике кешелек күңелле сәяхәт сертификаты тапшырылды.
Хат ташучылар, диюгә, никтер, күз алдына иңнәренә олы букча аскан, велосипедка атланган хезмәт кешесе килеп баса. Җил-буранмы, яңгыр явамы, кояш кыздырамы, алар үзләренең эш урыннарында. Халыкка вакытлы матбугатны - ил-көн хәбәрләрен вакытында илтеп тапшыру бурычы бу тынгысыз хезмәт ияләренә йөкләнгән. Соңгы араларда бүлекчәләр почта өләшүчеләргә кытлык кичерә. Авыр хезмәт башкаруларына карамастан, хезмәт хакларының түбән, өстәмә йөкләмәләрнең күп булуы кайберләрен ныклыкка сыный. Үз эшләренә фанатларча бирелгәннәр сынатмый, яраткан хезмәтләрендә лаеклы эшләвен дәвам итәләр. Бигрәк тә абунә чорында почта бүлекчәләрендә кызу урак өсте башлана. "ТАТМЕДИА" җәмгыяте дә теләктәшлек күрсәтеп, аларның хезмәтен бәяләү максатыннан, газета-журналларга язылучылар санын арттыруга өлеш керткәннәр арасында бәйге игълан иткән иде. Аның җиңүчеләре билгеле булды. "Иң яхшы авыл хат ташучысы" исеменә лаек булган райондашыбыз Ләйсирә Салихова өчен без дә сөендек. 38 ел хезмәт стажының 32дән артыгы халыкка почта хезмәте күрсәтеп узган. Ул эшләгән Каташ Каран авылы участогында 147 хуҗалыкның 105е газета-журналлар алдыра. Язылучылар саны елдан-ел артып та тора. Уртача исәпләгәндә, бер хуҗалыкка икедән артык газета я журнал туры килә. Авылда барлыгы 300 төрле газета, 104 төрле журнал яздырталар.
- Идән юучы булып эшләгәндә, ялга киткән почта таратучы урынына вакытлыча эшләп торуымны сорадылар. Шул килгәннән бөтенләйгә калырга туры килде. Күпме гомер артта калган, авырлыклары да булды, ләкин бер генә тапкыр да үкенгәнем булмады. Хезмәтемә хилафлык китерми эшләргә тырыштым, - ди Ләйсирә апа.
Рәсәй Федерациясенең "Уникенче бишьеллык алдынгысы" күкрәк билгесе, күпсанлы Мактау грамоталары иясе, "Хезмәт ветераны" исемен йөртүче Ләйсирә Салихова булган дәрәҗәле исемнәреннән дә әһәмиятлерәк, зуррак, дип, халык биргән бәяне - аларның рәхмәт сүзләрен ишетүен саный. Бер авылдан икенче авылга араны да кертеп, көненә күпме чакрымнар үтүен исәпләп әйтсәң, мөгаен, үзе дә ышанмас. "Эх, бер велосипед бирсәләр үзегезгә", - дим. "Булмасмы әле, өметне өзмик, бүләкләү тантанасына баргач, республика буенча бүленеш башланды, дип сөендерделәр әле, бәлки, безгә дә чират җитәр", - диде. Иншалла, булсын. Бу хәбәрне ишетеп, без дә сөендек. Эшләренә бераз җиңеллек өстәлер иде.
- Янурыс авылы участогы почтальоны Нәфисә Миңнехуҗина (ред. узган ел район бәйгесе җиңүчесе) белән озак еллар бергә аңлашып, ярдәмләшеп эшлибез. Бу җиңүем дә - безнең уртак хезмәт нәтиҗәсе. Күптән түгел генә эшли башласа да, авыл почтасы бүлекчәсе җитәкчесе Альбина Әхкямова белән дә тиз арада уртак тел таптык, элекке җитәкчебез Рәсимә Мирзасалихова белән матур эшләдек.
Бүлекчәгә вакытлы матбугатка яздыртудан, аларны таратудан тыш, товар сату, төрле түләүләрне кабул итү буенча да йөкләмә бирелгән. Аларын да үтәргә тырышалар биредә.
Газета-журналлар редакцияләрендә хезмәт куючыларның эше почта хезмәткәрләре белән тыгыз бәйләнештә бара. Абунә чорында шулай бердәм булып, матур күрсәткечләргә ирешеп эшләү бер-беребез өчен горурлык хисләре уята. Халык белән безне очраштыручы, дуслаштыручы да - алар бит.
Следите за самым важным и интересным в Telegram-каналеТатмедиа
Нет комментариев