Песи йомырка ашыймы?

Үземә дә кызык. Кибеттән махсус йомырка салдыра торган витаминлы ярмалар да алып кайтып карадык, ләкин ярдәме тимәде. Көн артыннан көн үтте, ә йомырка юк! Сараеңда тавык була торып, кибет йомыркасы сатып алмассың бит инде, дия идем. Алган саен, ачу да килә бит. Моңа кадәр әллә игътибарга алмаганбыз: тавыклар арасында бер ак песи пәйдә булды. Бу җан иясе кемнеке, ник менә нәкъ безнең сарайга ияләшкән, безнең сарайда ни эшли ул? Бу сораулар көннән-көн уйландыра башлады. Димәк, йомырканы песи ашый?.. Үзем йомырка сатып алам, үзем һаман теге песине уйлыйм. Алмыйча да булмый, гаиләбез ишле, аш-су әзерләгәндә, гел йомырка кирәк булып тора. Кибеттән йомырка алырга уйласаң, бик кыйммәт, бәяләр кимүгә бармый. Төрле кибеттә төрле бәягә саталар әле. Кайсысында бер данә йомырка — 7 сум, кайда — 8, хәтта 9 сумлыгы да бар. Бер танышым әйтә: “Чаллыда күптән базардан дистәсен 90 сумнан алдым. 60 сумга сатарга мөмкин булганда да, ул бәягә куймадылар шәхси хуҗалыктагысын. Чөнки халык үзе дә азынды: очсыз булса, кибетнеке дип уйлап, алмый гына”. Менә хикмәт! Өйдә: “Барыбер йомырка салмыйлар, әллә соң тавыкларны бетерикме?”, - диеп уйлашабыз да, кибет йомыркасының бәяләре күз алдына килеп баса, һәм ул фикердән кире кайтабыз. Ә, бәлки, иртәгә, аннан соң салырлар, дигән өмет белән тормыш дәвам итә.

Ә сезнең тавыклар йомырка саламы? Әллә сез дә кибеттән сатып аласызмы, дуслар? Тавыклар йомырка салсын өчен, ни эшләргә кирәк? Сездән киңәшләр көтәбез. Языгыз, шалтыратыгыз.

Автор: Алсу Бормотина