Җәлил урта гомуми белем бирү мәктәбе укучысы республика конференциясендә диплом алды

21 декабрьдә Яр Чаллы шәһәренең Гали Акыш исемендәге 84 нче санлы лицей-интернатында "Яшьләр фәнни эзләнүдә" дип исемләнгән республика фәнни-практик укучылар конференциясе узды. Анда Җәлил урта гомуми белем бирү мәктәбенең 10 нчы сыйныф укучысы Инна Целипкова "Инглиз филологиясе" секциясендә икенче дәрәҗәле дипломга лаек булды. Алданрак Инна "Без яшь, без сәләтле" конференциясенең "Фольклор, халык педагогикасы" секциясендә өченче дәрәҗәле диплом алган иде. Кызның фәнни җитәкчеләре - Җәлил урта гомуми белем бирү мәктәбенең инглиз теле укытучылары Заря Вәлиәхмәтова һәм Айгөл Нуретдинова.